Il Decanât di Tarvis

La storie de Colaborazion pastorâl di Tarvis (tal passât Decanât e plui tart Foranie) e je cetant leade a chê de Valcjanâl. Dal 1007 al 1759 la val e je stade sot de autoritât politiche e aministrative de Diocesi di Bamberg (in Franconie, in dì di vuê Gjermanie); daspò e je passade a la Austrie, cuntune curte dominazion francese vie pes campagnis di Napoleon.

Dopo de prime vuere mondiâl, cu la dissoluzion dal Imperi di Austrie-Ongjarie, la Valcjanâl e je passade a la Italie cul Tratât di Saint-Germain-en-Laye (1919).

Plui tart, la emigrazion dai abitants di lenghe todescje e slovene – tacade daspò de vuere e cressude  cu lis opzions dal 1939, o ben cul acuardi tra Mussolini e Hitler par movi i abitants di lenghe todescje tal Reich – e à cambiât a fonts la struture etniche de zone.

Il passaç sot de Arcidiocesi di Udin

Tal 1933, Pape Piu XI al à puartât in maniere definitive il Decanât di Tarvis te Arcidiocesi di Udin, cjapant dentri ancje la parochie di Fusinis. Il prin al rivave de Diocesi di Gurk in Carinzie (Austrie), la seconde de Diocesi di Lubiane (Slovenie). In dì di vuê, i fedêi de Colaborazion pastorâl di Tarvis a dan vôs ae lôr fede no dome par talian, ma ancje par sloven, todesc e furlan, sedi tai cjants che te liturgjie. La unitât te diversitât nus ricuarde la nature universâl dal messaç cristian.

Lis Parochiis de Colaborazion pastorâl di Tarvis

Malborghet cun Lusniz e Sante Catarine

Ugovize cun Valbrune

Cjamparòs cu la Mont Sante di Lussari

Tarvis cun Cocau

Fusinis

Rabil