Ugovize

Ukve

Uggowitz

Ugovize

Glesie dai Sants Filip e Jacum

La glesie parochiâl, nomenade pe prime volte tal 1260, e je tra lis plui antighis de val e e je dedicade ai Sants Filip e Jacum. Copatron di Ugovize al è invezit Sant Sebastian, che si avodavisi a protezion de peste, dutune cun Sant Roc. Par memoreâ il periodi che Ugovize e fo colpide di une grande epidemie di peste vie pe Ete di Mieç, tal 1668 al fo butât jù il mûr setentrionâl, par zontâi une capele dedicade a Sant Sebastian.

La glesie e je stade fate sù plui voltis: la struture di vuê e je dal 1930, ma e je stade cuasi dal dut ricostruide dopo de diluvion dal 2003, cuant che e je stade rinovade cuntun ingrès a Sud, une aule centrâl retangolâr e un presbiteri poligonâl disponût bande Nord. La capele di Sant Bastian e je stade puartade te navade laterâl, sot dal cjampanili. Il cimitieri al jere tacât de glesie bielzà tal 1723.

Te navade principâl al è logât l’altâr maiôr dedicât ai Sants Filip e Jacum, cu lis lôr statuis di len; l’altâr laterâl al è invezit dedicât a Sante Barbare. Te capele laterâl a son l’altâr e lis statuis dai Sants Sebastian e Roc. Si puedin notâ, tra l’altri, segns di afrescs dal Sietcent.

Dilunc de Messe de domenie, che si dîs par talian, a son ancje parts par sloven, e te glesie e je inmò esponude la Via Crucis cun scritis par sloven.

ORARIS DES MESSIS

Miercus – 19.15

Domenie – 9.30

Fiestis e ricorencis

Sants Filip e Jacum (ai 25 di Lui)

Sant Sebastian (ai 20 di Zenâr)

Valbrune

Ovčja vas

Wolfsbach

Valbrune

Glesie de Santissime Trinitât

La glesie di Valbrune, che in dì di vuê e je filiâl di Ugovize, e je dedicade ae Santissime Trinitât. L’edifici origjinari al è stât tirât sù tal 1666 in stîl gotic carinzian; la navade e je stade zontade dilunc dal stes secul.

La glesie e à plante retangolâr e abside poligonâl; il tor massiç cul orloi al à base cuadrade e al è poiât sul presbiteri. Tal edifici a son conservadis lis palis dai altârs maiôr e laterâl, che a son dal 1660 e che a mostrin la Trinitât e la Madone cul Frutin, adorade dai Sants Carli Boromeu e Ambrôs.

Te façade de glesie e je fissade cualchi lapide che e memoree i plevans che a àn servît a Valbrune. A man çampe de puarte di jentrade de glesie e je ancje chê di Jurij Prešeren (1805-1868), fradi dal innomenât poete sloven France.

Dilunc de Messe, che si dîs par talian, a son ancje parts par todesc e par sloven.

ORARIS DES MESSIS

Sabide – 19.00

Fiestis e ricorencis

Santissime Trinitât (domenie dopo des Pentecostis)

Sante Luzie (ai 13 di Dicembar)