Glesie di Sant Lenart

L’edifici al è stât fat sù tor il 1463 tal puest di une capele che e esisteve za, e al è deventât glesie parochiâl tal 1500. Tal 1797 e je stade zontade la capele de Madone Dolorade o dai Siet dolôrs; l’altâr laterâl de Imaculade Concezion al è dal 1872. Te glesie e je inmò esponude la Via Crucis cun scritis par todesc.

Cheste glesie e je un esempli cetant impuartant di architeture religjose de Valcjanâl. Come che e memoree une targhe di piere tal mûr difûr de abside, l’edifici al è dal 1463 e lu caraterize un stamp stilistic che al rimande al gotic, che si viôt tes proporzions e te struture origjinarie de costruzion. La semplicitât e la verticalitât tipiche dal gotic si percepissin inmò in dì di vuê, no cate i cambiaments fats vie pai secui.

Come par tantis glesiis de Valcjanâl, il furniment origjinari al è stât cambiât tal timp, dispès cun elements di gust baroc o che a tirin bande chel stîl. Ancje la glesie di Sant Lenart no fâs ecezion: dentri a dominin altârs siôrs di decorazions, cun spirâls, doraduris e detais lavorâts cun finece. Dut câs, chescj elements no rindin pesant il spazi sacri: al contrari, a judin a dâ ae glesie une elegance sclete e armoniose, che e valorize la spiritualitât dal ambient cence colâ tal ecès.

La cumbinazion tra la struture gotiche origjinâl e il furniment baroc e cree un dialic interessant tra epochis diferentis, e e fâs de glesie di Sant Lenart un lûc di grant atrat storic e artistic, e ancje un pont di riferiment pe comunitât locâl e pai visitadôrs che a àn gust di jentrâ te storie e te culture religjose de Valcjanâl.

Oraris des Messis
:

Sabide – 17.00

Fiestis e ricorencis

Sant Lenart abât (ai 6 di Novembar)