Tarvis

Tarvis

Trbiž

Tarvis

Glesie parochiâl dai Sants Pieri e Pauli

Te glesie, i rîts religjôs a son par talian, e cualchi volte par todesc; cun di plui, e je di gnûf esponude la Via Crucis cun scritis par todesc.

La Glesie parochiâl dai Sants Pieri e Pauli a Tarvis, che si pues viodi in Place Unitât, e je stade fate sù tal 1445 e slargjade tal 1960. E je un esempli impuartant di glesie fortificade alpine: tal passât e jere cercenade di mûrs e e veve trê tors di difese; di chestis, in dì di vuê a ‘nt restin dôs. E veve tignût dûr denant de invasion dai turcs tal 1478, ma tal 1492 i àn dât fûc. 

L’edifici al à une navade gotiche cun capelis laterâls barochis. I afrescs dal Cinccent, che a vegnin atribuîts a mestris di Vilac, a cjapin dentri oparis di Thomas von Villach, cun senis de Bibie tant che la Anunziazion, la Nativitât e la Resurezion. Te abside a son ancje un afresc cun Carli V a cjaval (1532), un altâr policrom dal 1728, un preseât côr di len dal Sîscent e un altâr dal Cuatricent cu la Incoronazion de Vergjine.

In altris afrescs si puedin viodi storiis dal Vanzeli e une viodude di Tarvis fortificade tal 1500, a testemoneâ il rûl di difese de glesie, tirade sù tant che ricovar cuintri des incursions dai Turcs.   Su la façade al è un afresc cun Sant Cristoful; cun di plui, sul mûr esterni dal edifici a son une vore di lapidis di fameis nobilis tarvisianis, cun scritis in gotic e tantis figuris: si trate di ce che al reste di un cimitieri antîc, discomparît cui lavôrs di rinovament. Dentri, altârs barocs, sentis di len, tombâi, il pulpit. 

OrariS DES messIS:

Miercus – 18.00

Vinars – 18.00

Domenie – 8.00, 11.00, 18.00

Fiestis e ricorencis

Sants Pieri e Pauli (ai 29 di Jugn)

Cocau

Guggau

Kokova

Cocau

Glesie di Sant Nicolau

Daûr des fonts, la costruzion de glesie – che fintremai al 1986 e jere parochiâl – e je stade fate tor la metât dal Tresinte, sot dal vescul di Bamberg Eberhard I. Costituide di une sole aule retangolâr, e je stade dopo plui voltis cambiade e slargjade; i son stâts zontâts il presbiteri poligonâl e il cjampanili.

Cheste glesie e je interessante ancje par vie di ce che al è sucedût tai timps de leghe dai contadins e des bataiis cuintri dai Turcs. Chê di Cocau e je stade la prime glesie-fuartece de Valcjanâl che – cuant che a jerin incursions, asedis e atacs – e rivave adore di tignî dentri dute la int dal paîs. Tal interni e conserve il cicli di afrescs cun storiis de Passion di Crist (di scuele furlane), la Adorazion dai Trê Rês (di un autôr todesc) e Sant Nicolau cu lis trê sferis di aur (opare di un pitôr di scuele nordiche dal Cuatricent); a son conservadis ancje dôs statuis di len di Sant Nicolau, che une e je dal Tresinte. Fûr de glesie al è esponût un crucifìs di len.

Sot dal cjampanili e je stade cjatade une cripte cun ce che al reste di plui o mancul tresinte personis. La lôr storie e podarès jessi leade ae bataie te plane di Cocau dai 27 di Lui dal 1478 tra i Turcs, vuidâts di Iskender Pascià, e un piçul numar di contadins dal puest «sot de vuide di un ciert Mathiasch» (che cualchidun al coleghe ae mitiche figure slovene dal re Matjaž). Tacâts di ogni bande, i contadins in curt a son stâts ducj copâts.

OrariS DES messIS:

Sabide – 17.00

Fiestis e ricorencis

Sant Nicolau (ai 6 di Dicembar)

Rute

Greuth

Rute

Rutis

Glesie di Sant Antoni

Te frazion di Rute, in localitât Überwasser, isolade suntun prât, e je la gleseute di Sant Antoni. Dentri e à un altâr di len, che al vares di jessi de fin dal Sietcent-inizi dal Votcent, cuntune statue di len dal Sîscent di Sant Antoni cul Frutin..

OrariS DES messIS:

–

Fiestis e ricorencis

Sant Antoni (ai 13 di Jugn)

Tarvis Bas

Untertarvis

Spodnji Trbiž

Tarvis Bas

Glesie de Vergjine di Laurêt

La carateristiche glesie baroche de Vergjine di Laurêt a Tarvis Bas, destinade ai abitants dal borc, e fo restaurade dopo di un incendi tal secul XIX, e rinovade tal secul XX.

Fate sù tal 1689 par volontât de famee Von Rechbach, la glesie e je un esempli preseât di art baroche. Dute frescjade e decorade cun fast, e conserve oparis di artiscj di di là des Alps, cun influencis talianis.

Tra lis oparis plui preseadis a son pituris su taule dal 1520 che a mostrin i Apuestui, la Anunziazion e la Visitazion, in plui che telis dal Sîscent e un altâr maiôr dedicât ae Beade Vergjine di Laurêt, ornât cun decorazions doradis e cuntune statue de Madone nere cul Frutin.Dut il complès des pituris al è incentrât sul teme de Assunzion de Vergjine in cîl, tratât cun cetante elegance e armonie visive.

OrariS DES messIS:

–

Pleçut

Flitschl

Flitšelj

Pleç

Glesie dai Sants Filip e JacumTe localitât di Pleçut si cjate la glesie dai Sants Filip e Jacum. E je dal secul XVII, ma la sô fondazion e je forsit plui antighe. Dentri e à un altâr baroc cui Sants Maur e Cristoful; tal passât e veve ancje un Flügelaltar (altâr cu lis portelis) dal 1514, che al rafigurave i doi Sants, protetôrs dai minadôrs e dai viandants. Cheste opare mestre de piture rinassimentâl carinziane e je conservade tal Museu diocesan di Clanfurt.

OrariS DES messIS:

–

Tarvis Centrâl

Mittertarvis

Srednji Trbiž

Tarvis Centrale

La glesie di Sant Michêl a Tarvis Centrâl

Screade tal 1940, la glesie di Sant Michêl e je tal cûr di Tarvis Centrâl, no tant lontane de stazion feroviarie, là che ator ator si ere disvilupât il borc. La sô costruzion e je stade pussibile in gracie dal impegn de Milizie feroviarie di chê volte, cul jutori e cu la colaborazion di tancj citadins dal puest, testemoneant un sens fuart di comunitât e di partecipazion popolâr.

L’edifici al è sempliç, fat cun modons ros a viste, e al pant une atmosfere cuiete e sclete. Dentri al è un grant mosaic che al mostre San Michêl, inspirât di une piture famose di Guido Reni, che al domine la abside cun imponence e spiritualitât. Cun di plui, sul paviment a son doi mosaics de ete dal venteni fassist, elements che a testemonein la stratificazion storiche e artistiche complesse dal lûc. Ancje se cun semplicitât architetoniche, la gleseute e rapresente un pont di riferiment impuartant pe comunitât, simbul di fede, memorie storiche e identitât locâl, che si inserìs cun armonie tal contest dal borc feroviari.

OrariS DES messIS:

–

Fiestis e ricorencis

San Michêl arcagnul (ai 29 di Setembar)